حیدرآباد کے میڑچل ملکاجگیری ضلع میں ایک غیر معمولی واقعہ پیش آیا، جہاں ایک شادی شدہ خاتون اپنے شوہر اور بچوں کو چھوڑ کر ایک نوجوان کے ساتھ چلی گئی۔ اطلاعات کے مطابق، ان دونوں کی سوشل میڈیا پر ملاقات ہوئی تھی، جو بعد میں گہری دوستی اور محبت میں تبدیل ہوگئی۔
تفصیلات کے مطابق، 35 سالہ خاتون، جس کی شادی جئے راج نامی شخص سے ہوئی تھی اور ان کے دو بچے بھی ہیں، سوشل میڈیا کے ذریعے 22 سالہ نوجوان گوپال سے رابطے میں آئیں۔ وقت کے ساتھ، ان کا تعلق مزید مضبوط ہوا اور انہوں نے ایک ساتھ زندگی گزارنے کا فیصلہ کیا۔
خاتون کے اچانک لاپتہ ہونے پر جئے راج کو شبہ ہوا، جس کے بعد اس نے اپنی بیوی کا تعاقب کیا اور میڑچل آکسیجن پارک کے قریب انہیں پکڑنے کی کوشش کی۔ تاہم، دونوں نے موقع دیکھ کر اپنی موٹر سائیکل چھوڑ دی اور ایک گزرتی ہوئی بس میں سوار ہو کر فرار ہوگئے۔
واقعے کی اطلاع ملنے پر شوہر نے پولیس میں شکایت درج کرائی، جس کے بعد پولیس نے تحقیقات کا آغاز کر دیا۔ حیرت انگیز طور پر، ان کے فرار کا منظر قریبی سی سی ٹی وی کیمروں میں محفوظ ہوگیا، اور اس کی ویڈیو سوشل میڈیا پر تیزی سے وائرل ہو رہی ہے۔ پولیس معاملے کی مزید تفتیش کر رہی ہے۔
