رمضان المبارک کے دوران مساجد میں خاص روحانی ماحول دیکھنے کو ملتا ہے، اور بھارت میں دو ایسی تاریخی مساجد موجود ہیں جو اپنی انفرادیت کی وجہ سے مشہور ہیں۔ مدھیہ پردیش کے بھوپال میں واقع تاج المساجد ایشیا کی سب سے بڑی اور دنیا کی تیسری بڑی مسجد ہے، جہاں بیک وقت ایک لاکھ پچھتر ہزار نمازی نماز ادا کرسکتے ہیں۔ اس عظیم الشان مسجد کی تعمیر کا خواب سکندر بیگم نے دیکھا، جسے ان کی بیٹی شاہجہاں بیگم نے 1901 میں مکمل کروایا، اور بعد میں 1985 میں اس کی تزئین و آرائش کی گئی۔
بھوپال میں ہی واقع ڈھائی سیڑھی مسجد ایشیا کی سب سے چھوٹی مسجد سمجھی جاتی ہے۔ محض 16 مربع میٹر پر مشتمل اس تاریخی مسجد کی تعمیر تقریباً تین سو سال قبل ہوئی تھی۔ اس کا منفرد نام اس کی سیڑھیوں کی تعداد کی وجہ سے پڑا، کیونکہ اس میں صرف ڈھائی سیڑھیاں ہیں، یعنی تیسری سیڑھی آدھی بنی ہوئی ہے۔
ان مساجد تک کیسے پہنچیں؟
تاج المساجد بھوپال ریلوے اسٹیشن سے 3 کلومیٹر جبکہ ایئرپورٹ سے 15 کلومیٹر کے فاصلے پر ہے۔
ڈھائی سیڑھی مسجد ریلوے اسٹیشن سے 1.43 کلومیٹر دور ہے اور آسانی سے آٹو رکشہ یا ٹیکسی کے ذریعے پہنچا جا سکتا ہے۔
